Благица Давчева
Моето искуство од Work & Travel во Соединетите Американски Држави беше една од најубавите и најдрагоцените авантури во мојот живот. Програмата ми даде шанса да станам понезависна, да научам нови работи и да запознаам луѓе од целиот свет.
Работата што ја имав беше одлична можност да научам како да се снајдам во динамична средина и секој ден да комуницирам со различни гости. Иако многумина велат дека најубавиот дел од Work & Travel е патувањето на крајот, за мене најзначајните спомени секогаш ќе бидат оние четири месеци поминати на работа. Таму се поврзав со луѓето што ги гледав секој ден, колеги што брзо станаа блиски пријатели, со кои ги делев и исцрпеноста и смехот, и убавите и тешките моменти, и со кои излегував и се забавував по работа.
Тие пријателства, енергијата, тие мали секојдневни моменти што ги делите со истите луѓе — тоа е она што најмногу ќе го паметам и што го направи целото ова искуство навистина посебно.
